L'èlber d' Nadèl - Giuseppe Paradisi

L'èlber d' Nadèl

L'èlber, st'ân, a i-ò pruvèe a fèrel mè
(a spér daboun ch'a 'n gh'sìa gnint da dir),
a i-ò cumprèe un po' d'qual ch'a s'tróva in gir
e a l'ho fat come una volta... propria acsè!

In dl'angulèin pió scur ed la cusèina
cun mandurlèin, figh sècch e quelch linzóla
guciaróo, mandarèin... roba da fola
a un bròch, a g'ho impî la zimalèina.

C'sa vôt ch'a t' déga a i era sudisfat
(a vêl la pèina, per tant, turnèr putèin)
turnèr indrée col tèimp, ün al s' sèint bèin
in 'ste mànd contestee da di mez mat.

A guèrd l'èlber.... a-amir cla bèla vésta !
E po' a ciâm me muiéra e me anvudèin ;
Lò a vàder la me "opra" al fa al mesclèin
e Lê la'm dîs ch'a sun un mèz artésta.

A cambi i ucée vèc; am mètt chi nóv
a vrévv zugatlèr coi sentimèint:
mo a vèd un èlber fint coi fil d'argeint
e an sò brisa dirét cus'a prov.

El lùs a intermittèinza, i balunzèin
e tant ed chi lustrein da dêr la bâla
che am vin da pensèr che in una stâla
l'è nee cal Crést putèin, fra i putèin!

A guerd la me 'vecia' e al 'me cinèin'
el dô lûs dl'albarèin d'la mee famìa
el lûs d'un "pover crést" pin d' fantasìa
ch'al sgóba per l'amór e per al bèin.

E a sun mè ch'an gh'ò piò gnint da dir
a guèrd fóra tótt cl'iluminazioun
a sèint i "canti bit" ed zért caploun
che propria al dè d' Nadèl im fan schermir !